මහ රහතුන් වැඩි මඟ ඔස්සේ 15

මේ ලිපි මාලාව ලියූ ස්‌වාමීන්
වහන්සේ මේ වන විට කොහි වැඩ
සිටිනවාදැයි මම නොදනිමි.
එහෙත් උන්වහන්සේ මේ පින් බිමේ
කුමන හෝ ගැඹුරු වනගැබක
අලි, කොටි, වළසුන් මැද ඒක
විහාරීව දහම් සුව විඳිමින් සිටිතැයි
මම විශ්වාස කරමි. මේ ඝෝර
කටුක සංසාරයේ බිය දැක මේ
ආත්මයේදීම සසර දුකින් එතෙරවීම
අදිටන් කරගනිමින් සෘජුව නිවන්
මඟේ ගමන් කළ උන්වහන්සේ ලබා
ඇති මග ඵල ගැන කියන්නට තරම්
මම සමතෙක්‌ නොවෙමි. එහෙත්
උන්වහන්සේ වැඩිය යුතු බවුන්
වඩන උතුමකු බව කියන්නට මම
නොපැකිලෙමි. තම අවබෝධය
මෙන්ම අත්දැකීම්ද
උන්වහන්සේ සතු වූ කුඩා පොත්
කිහිපයක සංස්‌කරණය නොකළ
සටහන් ලෙසින් මා අතට පත් කළ
උන්වහන්සේ නෙපෙනී ගියහ.
එහෙත් ඒ සටහන්
කෙතරම් දාර්ශනිකද, ගැඹුරුද
ආශ්චර්යමත්ද. නිවන් මඟට පිළිපන්
ගිහි පැවිදි උභය පාර්ශ්වයට ම
මෙය අගනා පූජාවක් වනු ඇතැයි
මගේ පුහුදුන් සිත කියයි.මේ
සියල්ල ඔබ වෙත ඉදිරිපත් වුවද
ඒවා ලියු උන්වහන්සේගේ නාමය
හෙළි නොකරන සේ කරන ලද
ඇයැදුමක් ද විය.