හුණුවටයේ කතාවට මුල් වී ඇත්තේ එකිනෙකට අසමාන වූ සංස්කෘතීන් කිහිපයක ම ජනප්‍රිය ව පවත්නා කතා පුවතකි. දහතුන් වැනි සියවසේ රචිත පැරණි චීන නාට්‍ය‍යක මෙන්ම බයිබලයේත්, ජනප්‍රිය සිංහල ගද්‍ය ග්‍රන්ථයක් වන උම්මග්ග ජාතකයෙහිත් මෙම කතා ප්‍රවෘත්තිය දක්නට ලැබේ. එම කතා පුවත නම් කිසියම් බිළිඳකුගේ මාතෘත්වය අරබයා කාන්තාවන් දෙදෙනෙකු අතර ගැටුමත්, අවසානයේ දී විනිශ්චයකාරයෙකු විසින් එම අර්බුදය නිරාකරණය කිරීමත් ය.
